Joriy yilning 17-28 oktabr kunlari Investitsiyalar va tashqi savdo vazirligi tomonidan Koreya xalqaro hamkorlik agentligi (KOICA) bilan hamkorlikda "Tartibga solish bazasini isloh qilish va investitsiya muhitini yaxshilash dasturi" mavzusida seminar-trening tashkil etildi. Unda vazirlik va uning hududiy bo'linmalari xodimlari ishtirok etdi.

Trening davomida Koreya taraqqiyot instituti (KDI) va Koreya Respublikasining boshqa yetakchi Oliy o'quv yurtlari professor-o'qituvchilari mamlakatdagi investitsiyaviy muhitni yaxshilash uchun me'yoriy-huquqiy bazani takomillashtirishning samarali usullari bo'yicha ma'ruzalar va taqdimotlar o'tkazdilar, shuningdek investitsiya siyosatini rejalashtirish va amalga oshirish samaradorligini oshirish bo'yicha amaliy bilimlar bilan o'rtoqlashdilar.

Kurs yakunlari bo'yicha ishtirokchilar tomonidan olingan ko'nikma va malakalar asosida O'zbekiston Respublikasining investitsiya muhitini yaxshilash va ularni tizimli amalga oshirish bo'yicha aniq amaliy takliflar tayyorlandi.