Investitsiyalar va tashqi savdo vazirligining Xorazm viloyati hududiy boshqarmasi tomonidan Urganch tumanining sanoat salohiyati bilan yaqindan tanishish va korxonalarning ishlab chiqarish jarayonlariga yangi texnologik ishlanmalarni joriy etish maqsadida ishbilarmon doiralar va yetakchi oliy o‘quv yurtlari vakillari uchun texnik tur tashkil etildi.

Uning ishtirokchilari qator yirik sanoat korxonalarida bo‘lib, texnologik jarayonlar, ishlab chiqarilayotgan mahsulotlar va korxonalarni rivojlantirish istiqbollari bilan atroflicha tanishdi.

Tadbir yakunlari bo‘yicha sanoat korxonalari faoliyatiga mahalliy ilmiy-texnikaviy va dasturiy ishlanmalarni joriy etish maqsadida ishlab chiqarish quvvatlari va ilmiy markazlar o‘rtasidagi o‘zaro hamkorlik bo‘yicha qator kelishuvlarga erishildi. Xususan, shisha va shisha buyumlar ishlab chiqaruvchi “GlassPro” mas’uliyati cheklangan jamiyati ishlab chiqarish jarayonini avtomatlashtirish va intellektual boshqaruv tizimiga o‘tish bo‘yicha TATU Urganch filiali dasturchilari bilan hamkorlikni davom ettiradi.

“Bene Fruts” AJga qarashli in-vitro laboratoriya usulida ko‘chat yetishtirish korxonasi Urganch davlat universitetining kimyo-texnologiya fakulteti talabalarini amaliyotga jalb etadigan bo‘ldi.

Suvni tozalash filtrlari va tomchilatib sug‘orish uskunalari ishlab chiqaruvchi “Eko kompaniyalar” mas’uliyati cheklangan jamiyati Urganch viloyati innovatsion texnoparki bilan innovatsion texnologiyalarni ishlab chiqarishga joriy etish bo‘yicha yaqin hamkorlik qilishga kelishib olindi.