Joriy yilning 2-dekabr kuni Oʻzbekiston Respublikasi Bosh vazirining oʻrinbosari – investitsiyalar va tashqi savdo vaziri Jamshid Xodjayev Rossiya Federatsiyasi Hukumati rahbari Mixail Mishustin boshchiligidagi Rossiya delegatsiyasiga hamrohlik qilayotgan hukumat aʼzolari tarkibida Samarqandda “Made in Uzbekistan” milliy mahsulotlar koʻrgazmasiga tashrif buyurdi.

Ekskursiya davomida ta’kidlanganidek, “Made in Uzbekistan” koʻrgazmasining asosiy maqsad va vazifalari Rossiya bozorida oʻzbek brendlari va milliy mahsulotlarini ilgari surish, mahalliy eksport geografiyasini kengaytirish va hajmini oshirish, eksport shartnomalari portfelini shakllantirish shuningdek, tashrif buyuruvchilarni respublikaning ilmiy, ishlab chiqarish va eksport salohiyati bilan tanishtirish, investisiya loyihalarini amalga oshirish uchun keng imkoniyatlar taqdim etishdan iborat.

Oʻzbekiston va Rossiya delegatsiyalari ekspozitsiyaning qurilish materiallari, kimyo, elektrotexnika, mebel, toʻqimachilik, charm-poyabzal, farmatsevtika va oziq-ovqat sanoati, qishloq xoʻjaligi sohalari, shuningdek, zargarlik buyumlari namoyish etilgan barcha 9 ta boʻlimini borib koʻrdi.

Oʻzbekiston tarmoq birlashmalari tomonidan taqdim etilgan xalqaro standartlar asosida ishlab chiqarilgan mahsulotlar sifati bilan koʻrgazma mehmonlarida katta qiziqish uygʻotdi.

Namoyish etilgan namunalar orasida kimyo sanoati mahsulotlari: mineral oʻgʻitlar (azot, fosfor, kompleks), kimyoviy tolalar (akril toʻplam, tolalar), polietilen plyonka, polietilen quvurlar, oʻsimliklarni kimyoviy himoya qilish vositalari; elektrotexnika sanoati mahsulotlari: elektrotexnika, kabel va simli mahsulotlar (televizorlar, konditsionerlar, muzlatgichlar, changyutgichlar, kir yuvish mashinalari, mini pechlar, mobil telefonlar, mikrotoʻlqinli pechlar, alyuminiy, mis kabel va simli mahsulotlar, maishiy texnikada ishlatiladigan mis quvurlar) joy olgan.

Shuningdek, konditsioner tizimlari, quyosh suv isitgichlari, liftlar, tom yopish materiallari, marmar va marmar buyumlar, keramik plitkalar, boʻyoq va lak mahsulotlari, alyuminiy kompozit panellar, ikki oynali oynalar, rangli vitrajlar, gipsokarton, quruq qurilish aralashmalari, santexnika va boshqalar namoyish etildi.  

Oʻzbekiston toʻqimachilik sanoati stendi ekspozitsiya mehmonlariga paxta matolari, trikotaj, toʻqilmagan matolar, tikuvchilik buyumlari, kombinezonlar, sport kiyimlari, tabiiy ipak matolar, sharflar, yuksak badiiy mahoratga ega mahsulotlar toʻplami hamda tabiiy ipak va paxtadan tayyorlangan kiyimlarni ham namoyish etdi.

Erkaklar, ayollar va bolalar charm poyabzallari, sumkalar, charm-galanteriya mahsulotlari, teri xomashyosi, moʻyna, moʻynali kiyimlar va junlarning keng assortimenti tashrif buyuruvchilar, jumladan, Rossiyaning yirik biznes vakillarida katta qiziqish uygʻotdi.

Qishloq xoʻjaligi va oziq-ovqat mahsulotlariga alohida boʻlim ajratildi: unda yangi uzilgan sabzavot va mevalar, poliz mahsulotlari, sharbatlar, ichimliklar va konservalar, oʻsimlik yogʻi, mayonez, ketchup va vino va aroq mahsulotlari oʻrin oldi.

Mehmonlarda Oʻzbekiston zargarlik sanoatining oltin buyumlari kolleksiyasi alohida taassurot qoldirdi.

Tashrif yakunlari boʻyicha delegatsiyalar aʼzolari bunday koʻrgazmalar ikki tomon ishbilarmon doiralari oʻrtasidagi aloqalarni kengaytirish, hamkorlikni yoʻlga qoʻyishda muhim ahamiyat kasb etishini taʼkidladilar hamda Oʻzbekiston va Rossiya kompaniyalari oʻrtasida istiqbolli oʻzaro manfaatli savdo shartnomalari tuzilishini nazarda tutgan holda tadbir samarali oʻtishiga ishonch bildirdilar.